रुकुम पश्चिम -१०, वैशाख ।

नेपाल पत्रकार महासंघ रुकुम पश्चिम शाखाले आज प्रमुख जिल्ला अधिकारी मार्फत सम्माननीय प्रधानमन्त्रीलाई ज्ञापनपत्र बुझाएको छ । महासङ्घको केन्द्रीय कार्यक्रम अनुसार जिल्ला शाखाले प्रजिअ दिनेश प्रसाद थानी मार्फत प्रधानमन्त्रीलाई ज्ञापन पत्र बुझाएको हो ।

चैत १८ गते प्रधानमन्त्री तथा मन्त्रिपरिषद्‌को कार्यालयले सरकारी सञ्चार माध्यममा मात्र सरकारी विज्ञापन प्रकाशन तथा प्रसारण गर्ने निर्णय गरेकाले त्यसलाई सच्याउन ज्ञापन पत्र बुझाइएको महासङ्घले बताएको छ । जिल्ला सचिव दिपेन्द्र महतारा सहित पत्रकारको उपस्थितिमा बुझाइएको ज्ञापन पत्रमा सरकारको उक्त निर्णयले निजी तथा सामुदायिक सञ्चार माध्यमप्रति गम्भीर विभेद र अन्याय भएको ठहर गरेको छ ।

सरकारी निर्णय र परिपत्रले प्रेस तथा अभिव्यक्ति स्वतन्त्रताको अन्तर्राष्ट्रिय मापदण्ड र अभ्यास, नेपालको संविधानमा लिपिबद्ध पूर्ण प्रेस स्वतन्त्रता, सूचनाको हक, सञ्चारको हक, स्वतन्त्र पत्रकारिता, खुला अर्थ नीति र संघीयताको मर्म विपरित रहेको महासंघको ज्ञापन पत्रमा उल्लेख गरिएको छ ।

केन्द्रदेखि जिल्ला शाखाले यसअघि नै सरकारको विभेदकारी निर्णयप्रति असहमति जनाउँदै चैत २३ गते सञ्चार तथा सूचना प्रविधि मन्त्रीलाई ज्ञापनपत्र बुझाएको थियो । तर, लामो समयसम्म समस्या समाधानतर्फ सरकार उदासिन रहेको भन्दै महासङ्घले पुनः दोस्रो चरणका कार्यक्रम सार्वजनिक गरेको छ ।

सोही कार्यक्रम अनुरूप आज देशैभरका जिल्ला शाखाले प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाएका छन् । महासंघले सरकार समक्ष राखेका मागहरू तत्काल पूरा नगरेको खण्डमा आन्दोलित हुने जानकारी समेत गराएको छ ।