रुकुम पश्चिम -२३, चैत ।
नयाँ वर्षको अवसरमा मुसिकोट नगरपालिका -८, घोरखानीमा विविध खेलकुद तथा सांस्कृतिक कार्यक्रम आयोजना गरिने भएको छ । श्री तीन बहिनी युवा क्लबको आयोजनामा चैत २८ गतेदेखि प्रतियोगिताका रूपमा खेलकुद तथा सांस्कृतिक कार्यक्रम आयोजना गर्न लागिएको हो ।
क्लबका उपाध्यक्ष जय बहादुर ओलीका अनुसार क्लबको तेस्रो वार्षिकोत्सव तथा नयाँ वर्ष २०८३ को उपलक्ष्यमा खेलकुद सहित सांस्कृतिक कार्यक्रम आयोजना गरिने छ । क्लबले यसपटक प्रतियोगिताको रूपमा वडा स्तरीय पुरुष भलिबल, खुल्ला रस्साक्सी (पुरुष/महिला), एकल नृत्य र घैँटोफोर प्रतियोगिता सञ्चालन गर्न लागेको छ ।
भलिबलतर्फ प्रथम पुरस्कार ५१ हजार सहित कप, मेडल र प्रमाणपत्र, द्वितीय पुरस्कार २८ हजार सहित कप, मेडल र प्रमाणपत्र तथा सान्त्वना पुरस्कार दुई टिमलाई १५ हजार सहित कप, मेडल र प्रमाणपत्र प्रदान गरिने बताइएको छ । भलिबलका लागि दर्ता शुल्क ४ हजार तोकिएको छ ।
त्यस्तै एकल नृत्यतर्फ प्रमाणपत्र सहित प्रथम पुरस्कार २ हजार, द्वितीय पुरस्कार १५ सय र तृतीय पुरस्कार एक हजार तोकिएको छ । नृत्यका लागि दर्ता शुल्क २ सय कायम गरिएको छ ।
खुल्ला रस्साकसीका लागि प्रमाणपत्र सहित प्रथम पुरस्कार २ हजार, द्वितीय पुरस्कार १ हजार पाँचसय र तृतीय पुरस्कार १ हजार प्रदान गरिने आयोजकले बताएको छ । रस्साकसीको लागि दर्ता शुल्क २ सय राखिएको छ ।
कार्यक्रममा घैँटोफोर प्रतियोगितातर्फ विजेता पुरस्कार १ हजार र प्रमाणपत्रको व्यवस्था गरिएको छ । दर्ता शुल्क १ सय रुपैयाँ तोकिएको छ ।
भलिबल प्रतियोगितामा सहभागी खेलाडीले आफ्नो सक्कल नागरिकताको प्रमाणपत्र पेश गर्नुपर्ने, अनिवार्य खेल पोशाकमा उपस्थित हुनुपर्ने र खाना बस्न पनि आँफैले व्यवस्था गर्नुपर्ने छ ।
आयोजक तीन बहिनी युवा क्लबले विविध खेलकुद तथा सांस्कृतिक प्रतियोगितामा प्रदान गरिने पुरस्कार राशिबाट २५ प्रतिशत कर कट्टी गरिने बताएको छ ।
८ नम्बर वडा कार्यालय संरक्षक रहेको खेलकुद प्रतियोगिता तथा सांस्कृतिक कार्यक्रममा प्रस्तुत गरिने आमा समूह, टोल समूह युवा क्लब तथा विशेष झाँकीलाई उचित पुरस्कारले सम्मान गरिने भएको छ ।
खेलकुद प्रतियोगिता तथा सांस्कृतिक कार्यक्रमको उद्घाटन चैत २८ गते हुनेछ । वैशाख १ गते भने विशेष मेलाको आयोजना गरेर कार्यक्रम समापन गरिने आयोजकले जनाएको छ ।
