रुकुम पश्चिम -१३, फागुन ।
मुसिकोट नगरपालिका -१, सल्लेमा बुद्धभूमि मानव सेवा आश्रमको भवन निर्माण गर्न लागिएको छ । रुकुम पूर्व र रुकुम पश्चिमका केही स्थानीय सरकारको सहयोगमा आश्रमको भवन निर्माण गर्न लागिएको हो ।
आश्रमका सञ्चालक खम्ब प्रसाद जैसीका अनुसार ७५ लाख रकममा १२ कोठाको भवन निर्माण गर्न लागिएको छ । आश्रमको भवन निर्माणमा रुकुम पूर्वको पुथा उत्तरगंगा र सिस्ने गाउँपालिका तथा जिल्लाको सानीभेरी र त्रिवेणी गाउँपालिकाले आर्थिक सहयोग गर्ने प्रतवद्धता जनाएको जैसीले बताए ।
आगामी दुई महिनाभित्र उक्त भवनको निर्माण कार्य सम्पन्न गर्ने गरी केही दिन अघिबाट काम सुरु गरिएको छ । मनकारी दाता र आश्रमको केही रकमले दुई सय वर्ग मिटर जग्गा खरिद गरेर भवन निर्माणको काम अगाडि बढाइएको छ । आश्रमको भवन निर्माण पछि सहाराविहीनलाई आफ्नै आश्रममा ढुक्कले बसाल्न सकिने आश्रम सञ्चालक जैसीको भनाइ छ ।
हाल बुद्धभूमि मानव सेवा आश्रममा सहाराविहीन ११ जना व्यक्ति रहेका छन् । यस आश्रमले समाजसेवी तथा विभिन्न दाताको सहयोगमा यहाँ आश्रममा रहेकालाई विगत केही वर्षदेखि गास र बासको व्यवस्था गर्दै आइरहेको छ ।
