रुकुम पश्चिम -५, फागुन ।

उज्यालो पार्टी नेपाल रुकुम पश्चिमले निर्वाचन प्रतिबद्धता पत्र सार्वजनिक गरेको छ । मुसिकोटमा आज पत्रकार सम्मेलन आयोजना गरी निर्वाचन प्रतिबद्धता सार्वजनिक गरेको हो ।

फागुन २१ गते हुने प्रतिनिधि सभा सदस्य निर्वाचनका उम्मेदवार नरेन्द्र केसीले उज्यालो पार्टीको तर्फबाट निर्वाचन लक्षित चुनावी प्रतिबद्धता सार्वजनिक गरे । प्रतिबद्धता पत्रमा रुकुम पश्चिमको पानी, जडिबुटी र युवा शक्तिलाई एकीकृत गरी आर्थिक आत्मनिर्भरताको नयाँ मोडलमा खडा गर्ने लक्ष्य राखिएको छ ।

जसअनुरूप सुशासन, ऊर्जा र जलस्रोत, स्मार्ट कनेक्टिभिटी, एकीकृत कृषि, युवा स्वरोजगार र पर्यटन, शिक्षा र स्वास्थ्यमा आमूल परिवर्तन, कुपोषण मुक्त र स्वस्थ रुकुम निर्माण गर्ने मुख्य प्रतिबद्धताहरू अघि सारिएको छ । त्यस्तै जलवायु अनुकूलन र संरक्षण, खेलकुदका लागि गाउँ गाउँमा पूर्वाधार, सफा र सुन्दर रुकुम, पालिका स्तरीय विशिष्ट योजना, सामाजिक सुरक्षा, जातीय विभेद अन्त्य, एकीकृत बस्ती लगायत प्रतिबद्धता चुनावी संकल्पका रूपमा रहेका छन् ।

यसैगरी रुकुम पश्चिम ऊर्जा र जलस्रोतमा सम्भावनाको जिल्ला भएकोले चिलिमे मोडल लागू गरिने उम्मेदवार केसीले बताए । ठूलीभेरी नदी, सानीभेरी र स्यार्पु तालको पानी मार्फत रुकुमका नागरिकलाई आर्थिक समृद्धिमा जोड्ने योजना रहेको उनको भनाइ छ ।

जलस्रोत र जलविद्युतमा जनताकै लगानी र जनताकै आम्दानी निश्चित गर्न चिलिमे मोडल सम्भव भएको उम्मेदवार केसीले ठोकुवा गरेका छन् । यसैबाट पाँच वर्षको अवधिमा १० हजार युवालाई रोजगारीको ग्यारेन्टी गर्न सकिने उक्त पार्टीको प्रतिबद्धता रहेको छ ।