रुकुम पश्चिम -७, माघ ।

रुकुम पश्चिमका राजनीतिक दलका उम्मेदवारले आगामी निर्वाचनलाई भयरहित वातावरणमा सम्पन्न गर्न साझा प्रतिबद्धता जनाएका छन् । मुख्य निर्वाचन अधिकृतको कार्यालयले वुधबार मुसिकोटमा राखेको निर्वाचन आचार संहिता तथा अनुगमन बैठकमा बोल्दै उम्मेदवारले साझा प्रतिबद्धता जनाएका हुन् ।

निर्वाचन आयोगबाट स्वीकृत निर्वाचन आचार संहिता २०८२ अनुसार आगामी निर्वाचनलाई निष्पक्ष र पारदर्शी बनाउन सबै राजनीतिक दल र तिनका उम्मेदवार सचेत हुनुपर्ने निष्कर्ष निकालिएको छ । विगतका निर्वाचनमा भए गरेका कमी कमजोरीलाई समीक्षाका रूपमा आत्मासाथ गर्दै यसपटकको निर्वाचनलाई थप जिम्मेवार बनाउनुपर्नेमा सबै उम्मेदवारले एक्यबद्धता जनाए ।

निर्वाचन आचार संहिता सम्बन्धी भएको अन्तरक्रिया तथा छलफलमा उम्मेदवार र दलका प्रतिनिधिले यसपटकको निर्वाचनलाई सरल र सहज रुपमा सम्पन्न गर्नुपर्ने बताए । त्यसका लागि राजनीतिक दल र उम्मेदवारले नै निर्वाचन आचार संहिताको अक्षरस पालना गर्नुपर्ने छलफलको निष्कर्ष रह्यो ।

फागुन २१ गते हुने प्रतिनिधि सभा सदस्य निर्वाचनका लागि रुकुम पश्चिमबाट प्रत्यक्षतर्फ १२ जनाको उम्मेदवारी परेको छ । सोही सन्दर्भ पारेर मुख्य निर्वाचन अधिकृतको कार्यालयले राजनीतिक दलका प्रतिनिधि र उम्मेदवारसँग निर्वाचन आचार संहिता र अनुगमन सम्बन्धी अन्तरक्रिया कार्यक्रम गरेको हो ।