रुकुम पश्चिम – २८, पुस ।

जिल्लाको आठबिसकोट नगरपालिका -९, राडी बजारमा राष्ट्रिय वाणिज्य बैंकको शाखा कार्यालय सञ्चालनमा आएको छ । बैंकबाट हुने सबै प्रकारका सेवाहरू सञ्चालन हुनेगरी आजदेखि आठबिसकोट शाखा सुरु भएको हो ।

राष्ट्रिय वाणिज्य बैंकका मुसिकोट प्रमुख हेमन्त न्यौपानेले आठबिसकोट शाखाबाट बैंकिङ सेवा सम्बन्धी सबै कारोबार सुरु हुने बताए । जस अनुसार व्यक्तिगत तथा खुद्रा बैंकिङ सेवाहरू, डेविट/क्रेडिट कार्ड सेवाहरू, डिजिटल र ई बैंकिङ लगायत सेवाहरू उपलब्ध हुनेछन् ।

राष्ट्रिय वाणिज्य बैंकको कारोबार सेवा सुरु भएदेखि आठबिसकोटबासी खुसी भएका छन् । अबदेखि यहाँका नागरिकलाई सरकारी बैंङमा हुने कारोबारका लागि जिल्ला सदरमुकाममा आउनुपर्ने बाध्यता हटेर गएको छ ।

यसअघि राडी बजारमा अन्य बैंकका शाखा कार्यालय सञ्चालनमा आइसकेका छन् । तर बैंकमा हुने भिडभाडका कारण दिनभर लाइनमा बस्नुपर्ने बाध्यता थियो ।

अब भने राष्ट्रिय वाणिज्य बैंकको शाखा कार्यालय सञ्चालनले छिटो छरितो बैंकिङ सेवा प्राप्त गर्नेमा स्थानीय ढुक्क बनेका छन् । शाखा कार्यालयको औपचारिक उद्घाटन हुन भने बाँकी रहेको छ । यो शाखा वाणिज्य बैंकको तीन सय १२ औं शाखाको रुपमा सुरु भएको बताइएको छ ।