रुकुम पश्चिम -१५, पुस ।
रुकुम पूर्वका केशव रावलले रुकुमदेखि काठमाडौँ सम्मको पैदल यात्रा १५औं दिनमा पूरा गरेका छन् । राष्ट्रिय एकता, शान्ति र समृद्धिको सन्देश दिने उद्देश्यले पुस १ गतेदेखि सुरु गरेको पैदल यात्रा आज १५औं दिनमा पूरा गरेका हुन् ।
सिस्ने गाउँपालिका -८ रुकुम पूर्वबाट छिमेकी जिल्ला बाग्लुङ, पर्वत, कास्की, तनहुँ, चितवन, धादिङ हुँदै काठमाडौँसम्मको करिब ६ सय किलोमिटर दूरी पैदल यात्रा मार्फत पूरा गरेको रावलले बताए । आज दिउँसो नेपाली कम्युनिस्ट पार्टीको केन्द्रीय कार्यालय पेरिस डाँडामा पुगेका रावललाई पार्टी संयोजक पुष्पकमल दाहाल प्रचण्ड र सहसयोजक माधवकुमार नेपालले खादा र मालाले स्वागत गरे ।
सो क्रममा पैदल यात्राको उद्देश्य र अनुभव सुनाउँदै रावलले राष्ट्रिय झन्डा, कम्युनिष्ट पार्टीको हसिया हतौडा अंकित झण्डा र नेपाली कम्युनिष्ट पार्टीको चुनाव चिन्ह तारा अङ्कित झन्डा दुवै नेतालाई एकैसाथ हस्तान्तरण गरेका छन् ।
हिमाली जिल्ला रुकुम पूर्वको सिस्ने गाउँपालिका वडानम्बर -८, बाट पुष १ गते भुरुङ्गादेखि रावलले पैदल यात्रा सुरु गरेका थिए । काठमाडौँ सम्मको पैदल यात्रालाई विकास निर्माण सहित राष्ट्रिय एकताको सन्देश, सहिद, बेपत्ता, घाइते, अपाङ्गको समर्पण र सम्मानका लागि सुरु गरेर सफलतापूर्वक सम्पन्न गरेको उनले जानकारी दिए ।
रावल नेपाली कम्युनिस्ट पार्टीका लोकप्रिय युवा नेताको रूपमा परिचित छन् ।
