रुकुम पश्चिम -९, पुस ।

राष्ट्रिय एकता, शान्ति र समृद्धिको सन्देश दिने उद्देश्यले पैदल यात्रा सुरु गरेका रुकुमका केशव रावलले आज नवौं दिनको यात्रा सुरु गर्दै छन् । रुकुम पूर्वबाट सुरु गरिएको उनको पैदल यात्रा आठौँ दिनमा पोखरा पुगेर आज पोखराबाटै नवौं दिनको यात्रा सुरु हुँदैछ ।

राष्ट्रिय झन्डा, कम्युनिष्ट पार्टीको हसिया हतौडा अंकित झण्डा र नेपाली कम्युनिष्ट पार्टीको चुनाव चिन्ह तारा अङ्कित झन्डा बोकेर पैदल यात्रामा हिँडेका रावलले दैनिक ३५ देखि ४० किलोमिटर सम्मको यात्रा पूरा गरेको बताए । यात्राको क्रममा विभिन्न ठाउँका स्थानीय बासिन्दा, जनप्रतिनिधि, पार्टी शुभचिन्तक लगायतको स्वागत, सत्कार र शुभकामनाले आफ्नो यात्रा अझै सशक्त बनेको उनको भनाइ छ ।

पैदल यात्राकै क्रममा आठौँ दिन कास्की जिल्लाको ढिकुर पोखरी पुगेकै बेला नेपाली कम्युनिस्ट पार्टीका संयोजक तथा पूर्व प्रधानमन्त्री पुष्पकमल दाहाल प्रचण्डले आफुलाई प्रत्यक्ष टेलिफोन गरेको बताए । कम्युनिष्ट पार्टीको चुनाव चिन्ह र तारा अंकित झन्डा तथा नेपाली राष्ट्रिय झन्डाले साँच्चिकै शान्ति र समृद्धि तथा एकताको सन्देश प्रवाह भएको भन्दै प्रचण्डले फोन मार्फत आफूलाई दिएको शुभकामनाले पैदल यात्रा थप उत्साहजनक भएको रावलले सुनाए ।

उनले आठौँ दिनसम्मको पैदल यात्रा पूरा गर्दा ठाउँठाउँका स्थानीयसँग सडक पूर्वाधार, पर्यटन तथा विकास निर्माणका सन्दर्भमा पनि अन्तरक्रिया गरिएको जानकारी दिए । सो क्रममा प्राप्त गुनासालाई पार्टी र नेतृत्व समक्ष राखिने रावलको भनाइ छ ।

हिमाली जिल्ला रुकुम पूर्वको सिस्ने गाउँपालिका वडानम्बर -८, बाट पुष १ गते रावलले पैदल यात्रा सुरु गरेका हुन् । उनले काठमाडौँ सम्मको पैदल यात्रालाई विकास निर्माण सहित राष्ट्रिय एकताको सन्देश, सहिद बेपत्ता, घाइते अपाङ्गको समर्पण र सम्मानका लागि सुरु गरिएको बताएका छन् ।

रावलले पैदल यात्रालाई आफ्नो सामाजिक सञ्जाल फेसबुकबाट लाइभ अपडेट समेत गर्दै आइरहेका छन् । उनले काठमाडौँ सम्मको पैदल यात्रा पूरा गर्न अझै एक साता लाग्ने बताए । उनी नेपाली कम्युनिस्ट पार्टीका लोकप्रिय युवा नेता हुन् ।