सुर्खेत -२७, मङ्सिर ।
नेपाली कम्युनिस्ट पार्टीका सहसंयोजक माधवकुमार नेपालले संविधान, गणतन्त्र र लोकतन्त्रको रक्षा गर्न कम्युनिस्ट शक्तिहरू एक हुनुपर्ने आवश्यकता औँल्याएका छन् ।
कर्णाली प्रदेशको राजधानी सुर्खेतमा शनिबार आयोजित पार्टी एकता सन्देश सभालाई सम्बोधन गर्दै नेता नेपालले जनताको पीडा बुझ्ने, जनताको आशा र भरोसाको केन्द्र बन्ने र जनताको सेवामा समर्पित हुने उद्देश्यले कम्युनिस्ट एकताको अभियान अघि बढाइएको बताए ।
पूर्व प्रधानमन्त्री समेत रहेका नेता नेपालले देश र जनताको हितका लागि कम्युनिस्ट आन्दोलनले अतुलनीय योगदान गरेको उल्लेख गर्दै उनले भने, “कम्युनिस्टहरूले नेपालमा आमूल परिवर्तन सम्भव छ भन्ने कुरा व्यवहारबाट प्रमाणित गरिसकेका छन्,” ।
नेता नेपालले केही शक्तिहरूले केही पनि भएन भन्ने गलत भाष्य फैलाइरहेको आरोप लगाउँदै कम्युनिस्ट नेतृत्वमा शिक्षा, स्वास्थ्य, रोजगारी र पूर्वाधार विकासमा उल्लेखनीय प्रगति भएको दाबी गरे । “जनताको घाउमा मलम लगाउने काम कम्युनिस्ट सरकारले गरेको छ,” उनले भने ।
उनले प्राकृतिक स्रोतको सदुपयोगमा जोड दिँदै तेल, नुन, पेट्रोल जस्ता खानीहरूको उत्खनन् सम्भव भए नेपाली युवाले स्वदेशमै रोजगारी पाउने बताए । यसले आत्मनिर्भर अर्थतन्त्र निर्माणमा ठूलो टेवा पुग्ने उनको भनाइ थियो ।
नेता नेपालले कम्युनिस्ट आन्दोलनप्रति युवापुस्ताको आकर्षण बढ्दो क्रममा रहेको उल्लेख गर्दै जनताको सेवा र देशको विकास कम्युनिस्ट शक्तिले मात्र प्रभावकारी रूपमा गर्न सक्ने ठोकुवा गरे ।
सभामा सहभागी नेता कार्यकर्ताहरूले पार्टी एकता अभियानलाई सफल बनाउन संगठित रूपमा अघि बढ्ने प्रतिबद्धता व्यक्त गरेका छन् ।
