रुकुम पश्चिम -१३, मङ्सिर ।
नेपाल प्रिमियर लिग (एनपीएल) मा सुदूरपश्चिम रोयल्सले आफ्नो अपराजित यात्रालाई कायम गर्दै जनकपुर बोल्ट्सलाई ६ विकेटले पराजित गरेको छ । टियु क्रिकेट मैदानमा आज भएको खेलमा जनकपुरले दिएको १ सय ४५ रनको टार्गेट सुदूरपश्चिमले १७ ओभर चार बलमा पूरा गर्दै सहज जित दर्ता गरेको हो ।
आजको जित सँगै सुदूरपश्चिम रोयल्सले एनपीएलको दोस्रो सिजनमा लगातार पाँच खेल जित्दै प्लेम अफमा पुगेको छ । जनकपुर भने चारवटै खेलमा पराजित हुँदै अङ्क तालिकाको पुछारमा रहेको छ ।
यसैगरी आज भएको पहिलो खेलमा पोखरा एभेन्जर्सलाई लुम्बिनी लाइन्सले पराजित गरेको छ । उसले पोखरालाई तीन विकेटले पराजित गरेको हो ।
अब आइतबार एनपीएलको १९औं म्याच अपराहन्न ४ बजे कर्णाली याक्स र काठमाडौँ गोर्खाज बिच हुनेछ ।
मङ्सिर १ गतेदेखि सुरु भएको दोस्रो संस्करणको नेपाल प्रिमियर लिग एनपीएलमा कुल ८ वटा टिमको सहभागिता रहेको छ ।
यसपटक टियु क्रिकेट मैदानमा फ्लड लाईट र कुर्सी राखेपछि रात्रिकालीन समयमा पनि एनपीएलका खेलहरू सञ्चालन भइरहेका छन् । एनपीएलमा एसोसिएट र टेष्ट राष्ट्रका खेलाडीहरूको समेत सहभागिता रहेको छ ।
एनपीएलको फाइनल खेल मङ्सिर २७ गते हुनेछ । पहिलो संस्करणको एनपीएल उपाधि जनकपुर बोल्ट्सले जितेको थियो ।
