रुकुम पश्चिम -२८, कात्तिक ।
रुकुम पश्चिम खण्डमा पर्ने मध्यपहाडी राजमार्गको किटनी-साँख खण्ड पुनः एकसाता बन्द हुने भएको छ । कात्तिक १२ गतेदेखि सुरु गरिएको सडक स्तरोन्नतिको काम पूरा नभएकाले मङ्सिर ७ गतेसम्मलाई लोकमार्ग बन्द गर्न लागिएको हो ।
जिल्ला प्रशासन कार्यालय रुकुम पश्चिमका अनुसार सर्वपक्षीय निर्णयानुसार मङ्सिर एक देखि सात गते सम यातायातका साधन बन्द हुने भएका छन् । प्रशासनले सो समय सम्म यातायातका सवारी साधनलाई वैकल्पिक मार्ग प्रयोग गर्न अनुरोध गरेको छ ।
जसका लागि साना सवारी साधनको हकमा रानीकोट-किटनी-साँख खण्डमा प्रयोग हुने सवारी साधनहरूका लागि बैकल्पिक मार्ग खलंगा-राउखेत-छिङ-नाथिगाड-धाउन्ने हुँदै रुकुमकोट सडक खण्ड प्रयोगमा ल्याइने भएको छ ।
त्यस्तै ठूला सवारी साधनहरूको लागि बैकल्पिक मार्ग खलंगा देखि बाँफिकोट-पिपल-पोखरा-रुकुमकोट सडक खण्ड प्रयोग गर्न प्रशासनले अनुरोध गरेको छ ।
