रुकुम पश्चिम -३१, असार ।
रुकुम जिल्ला अदालतले आर्थिक वर्ष ८१/८२ मा लक्ष्यभन्दा बढी मुद्दा फैसला गरेको छ । आर्थिक वर्षको वार्षिक प्रतिवेदन अनुसार ४ सय ४२ मुद्दा फैसला गर्ने लक्ष्य राखिएकोमा ५ सय ६ वटा मुद्दा फैसला गरिएको हो ।
जिल्ला न्यायाधीश रामप्रसाद बस्यालले फैसला गरिएका मुद्दामा ३६४ देवानी र १६४ फौजदारी मुद्दा रहेको बताए । यसबाट १ सय १४.४७ प्रतिशतले मुद्दा फैसला गरिएको छ । यो प्रतिशत जिल्ला अदालतको तथ्याङ्कमा हालसम्मकै बढी मुद्दा फैसला गरिएको रेकर्ड बनेको छ ।
जिल्ला अदालत रुकुममा आर्थिक वर्ष ८१/८२ मा कुल ६७६ वटा मुद्दा रहेको बताइएको छ । जसअन्तर्गत नयाँ दर्ताका रूपमा ५०३ वटा र १७३ वटा मुद्दा अघिल्लो आर्थिक वर्षबाट सरेर आएका थिए ।
नयाँ दर्ता भएका कुल मुद्दाबाट ३३४ र अघिल्लो आर्थिक वर्षबाट सरेर आएका १७२ वटा मुद्दा फैसला भएका छन् । नयाँ र सरेर आएका समग्र मुद्दाको ७४.८५ प्रतिशतले मुद्दा फैसला गरिएको जिल्ला अदालत रुकुमले बताएको छ ।
अघिल्लो आर्थिक वर्षबाट सरेर आएको एकवटा मुद्दाको भने परीक्षण प्रतिवेदन नआएकाले अर्को वर्षका लागि जिम्मेवारी सरेको छ ।
७१ वटा मेलमिलाप आदेशतर्फ २१ वटा मिलापत्र गरिएको, तीनवटा प्रक्रियामा रहेको बताइएको छ ।
रुकुम जिल्ला अदालतमा फैसला गरिएका ५०६ वटा मुद्दामध्ये २४४ अर्थात् ४८.२२ प्रतिशत मुद्दा सम्बन्ध विच्छेदका रहेका छन् । उमेर नपुगी गरिएका विवाह र त्यसपछि उत्पन्न पति र पत्नीबिचको खटपटका कारण नयाँ नागरिकता लिनलाई सम्बन्ध विच्छेद हुने गरेको पाइएको छ ।
यसैगरी ९९२ वर्ष ३ महिना १८ दिन जम्मा कैद मध्य ४१७ वर्ष ४ महिना १९ दिनको कैद फर्छ्यौट गरिएको छ । पाँच करोड ४४ लाख ४१ हजार बढी जम्मा जरिवानामा २ करोड ४६ लाख ९० हजार फर्छ्यौट गरिएको वार्षिक प्रतिवेदनमा छ ।
त्यस्तै जम्मा क्षतिपूर्ति तर्फ ९४ लाख ६१ हजार मध्यमा १३ लाख ७२ हजार फर्छ्यौट गरिएको न्यायाधीश बस्यालको भनाइ छ ।
अदालतले सो कैद, जरिवाना र क्षतिपूर्ति फरार प्रतिवादीहरूबाट असुल गरी फर्छ्यौट गर्दछ ।
रुकुम जिल्ला अदालतमा पाँच लाख ८७ हजार बढी रुपैयाँ पीडित राहत कोषमा जम्मा भएको जनाइएको छ । रुकुम पश्चिम जिल्लामा फौजदारी मुद्दा अनपेक्षित रूपमा बढ्दै गएको अदालतको भनाइ छ ।
