रुकुम पश्चिम -१९, असार ।
मलेसियामा जारी एसिसी मेन्स यु-१६ इस्ट जोनको सेमिफाइनल खेलमा मलेसियाले नेपाललाई ९१ रनको सामान्य लक्ष्य दिएको छ । टस हारेर ब्याटिङ गरेको घरेलु टोली मलेसियाले ४३.१ ओभरमा सबै विकेट गुमाउँदै ९० रन मात्र बनाएको छ ।
मलेसियाले दिएको सामान्य लक्ष्य नेपालले पूरा गर्न सके फाइनल यात्रा तय गर्ने अवसर प्राप्त हुनेछ ।
मलेसियाका मोहम्मद फतुलले ७१ बलमा सर्वाधिक ३८ रन बनाए । कप्तान डिज पार्तो ३२ बलमा १० रनमा आउट भए । अन्य ब्याटरले दोहोरो अंकमा रन जोड्न सकेनन् ।
नेपालका अभय यादवले ४, शुभम खनालले ३ तथा कप्तान विपिनप्रसाद शर्मा र सचिन भट्टले समान १ विकेट लिए ।
नेपाल समूह ‘ए’ को विजेता र मलेसिया समूह ‘बी’ को उपविजेताको रुपमा सेमिफाइनल पुगेका थिए ।
समूह चरणमा नेपालले खेलेका सबै ४ खेल जितेको थियो । मलेसियाले भने समूह चरणका ४ मध्ये ३ खेलमा सफलता प्राप्त गरेको थियो ।
प्रतियोगिताको फाइनल ५ जुलाई (असार २१) मा हुनेछ ।
