रुकुम पश्चिम -१३, असार ।

यसवर्षको माध्यमिक शिक्षा परीक्षा (एसइई) को नतिजा आज सार्वजनिक गरिँदै छ । परीक्षा नियन्त्रक डा गणेशप्रसाद भट्टराईले साँझ सम्म परीक्षाफल सार्वजनिक गर्ने तयारी अन्तिम चरणमा पुगेको बताए ।

परीक्षाफल सार्वजनिक गर्न अहिले राष्ट्रिय परीक्षा बोर्डको बैठक बसिरहेको छ । उत्तर पुस्तिका परीक्षण र सम्परीक्षणको काम सकेर प्राप्ताङ्क इन्ट्री गर्ने काम समेत लगभग सकिएकाले आजै नतिजा प्रकाशन गर्न लागिएको छ ।

असार ६ गतेभित्रमा नतिजा सार्वजनिक गर्नेगरी कार्यतालिका बने पनि चैत २० गतेदेखि वैशाख १७ गतेसम्म शिक्षकको सडक आन्दोलनका कारण नतिजा प्रकाशनमा ढिलाई भएको थियो ।

२०८१ सालको चैत ७ गतेदेखि चैत १९ गतेसम्म सञ्चालन भएको एसइई परीक्षामा देशभरबाट पाँच लाख १० हजार विद्यार्थी सहभागी भएका थिए ।