रुकुम पश्चिम -३०, वैशाख ।
इलाका प्रशासन कार्यालय चौरजहारीले बुधबारदेखि राष्ट्रिय परिचयपत्र आवेदन दर्ताको काम प्रवाह गर्ने भएको छ । प्रशासनले आज एक सूचना जारी गर्दै आवेदन दर्ताको काम सुरु गर्न लागिएको बताएको छ ।
कार्यालय प्रमुख तोषराज केसीका अनुसार नागरिकहरूको राष्ट्रिय परिचयपत्र आवेदनका लागि कार्यालयमा दर्ता स्टेशन स्थापना गरिएको छ । अबदेखि नगरपालिका भित्रका नागरिकहरूले इलाका प्रशासनको दर्ता स्टेशन बाटै राष्ट्रिय परिचयपत्र आवेदन दर्ता (फोटो खिचाउने कार्य) गर्न पाउने छन् ।
यसका लागि प्रशासनले नेपाली नागरिकताको प्रमाणपत्र, बसाइँ सराईको प्रमाणपत्र, विवाह दर्ताको प्रमाणपत्र, पति वा पत्नीको मृत्यु भएको हकमा मृत्यु दर्ता प्रमाणपत्र र सम्बन्ध विच्छेद भएको हकमा सम्बन्ध विच्छेद दर्ता प्रमाणपत्र आवश्यक पर्ने बताएको छ ।
यसअघि राष्ट्रिय परिचयपत्रका लागि चौरजहारीवासी जिल्ला प्रशासन कार्यालय मुसिकोटमा जानुपर्ने बाध्यता थियो । तर अबदेखि नागरिकता सहित अनिवार्य गरिएको राष्ट्रिय परिचयपत्रको आवेदन पनि इलाका प्रशासनबाटै दर्ता हुने भएकोले चौरजहारी बासीमा खुसियाली छाएको छ ।
गएको २०८० साल माघ ८ गते चौरजहारीमा इलाका प्रशासन कार्यालय स्थापना गरिएको थियो । त्यसको ठिक दुई महिनापछि चैत १२ गतेदेखि नियमित सेवा प्रवाहको काम सुरु गरिएको हो ।
चौरजहारी इलाकाबाट नाबालक परिचय पत्र, नागरिकता, दलित, जनजाति र खसआर्य प्रमाणित तथा अन्य सिफारिस सम्बन्धी सेवा प्रवाहको काम सञ्चालन हुँदै आएको छ ।
