भरत चन्द 

रुकुम पश्चिम -५, वैशाख ।

समाचार संकलनका क्रममा खटिएका एभिन्यूज टेलिभिजनका पत्रकार सुरेश रजकको चैत १५ गते राजावादीले गरेको आन्दोलनका क्रममा आगोमा जलेर मृत्यु भयो । काठमाडौंको तीनकुनेस्थित एक घरमा आन्दोलनको भिडियो खिचिरहेका बेला आन्दोलनकारीले लगाएको आगजनीका कारण २९ वर्षीय पत्रकार रजकको ज्यान गएको पुष्टि भैसकेको छ ।

राजावादीले गरेको आन्दोलनले उग्र रुप लिएपछि रिपोर्टिङ्का क्रममा रहेका रजकलाई योजनाबद्ध ढंगले हमला गरिएको प्रारम्भिक अनुमान गरिएको छ । प्रेस स्वतन्त्रताको ग्यारेन्टी भएको देशमा समाचार संकलनकै क्रममा एक पत्रकारको हत्या हुनु अत्यन्तै दुःखद र चिन्ताजनक विषय बनेको छ ।

छानबिनको माग, राज्य मौन

पीडित परिवारले घटनाको निष्पक्ष र उच्चस्तरीय छानबिनको माग गर्दै आए पनि राज्य पक्ष हालसम्म मौन जस्तै छ । सुरेश रजकको परिवार र सहकर्मीहरूले घटनामा संलग्नलाई छिटोभन्दा छिटो पक्राउ गरी कारबाही गर्न माग गरेका छन् । तर, घटनापछि सरकारले कुनै ठोस प्रतिक्रिया भने दिएको छैन ।

पत्रकार संगठनको आक्रोश

रजकको मृत्युपछि सबै पत्रकार र पत्रकार आवद्ध विभिन्न संघ-संगठनले मृतक रजकको न्यायको लागि विभिन्न आन्दोलनका कदम चालिरहेका छन् ।

जसअनुरुप समाजवादी प्रेस संगठन नेपालले पनि रजकको न्यायको लागि सक्दो अभियान चलाएको छ । अध्यक्ष सम्भु श्रेष्ठका अनुसार संगठनले रजकको परिवारलाई भेटेर ५० हजार आर्थिक सहयोग गरेको बताएको छ ।

त्यस्तै बिहीबार मात्रै एक विज्ञप्ति जारी गर्दै पत्रकार रजकको हत्याप्रति गहिरो दुःख र आक्रोश व्यक्त गरेको छ । संगठनले पत्रकार रजकलाई ‘सहिद’ घोषणा गर्न, पीडित परिवारलाई उचित क्षतिपूर्ति दिन तथा उच्चस्तरीय न्यायिक छानबिन आयोग गठन गर्न माग गरेको छ ।

संगठनले काठमाडौंको शान्तिवाटिकामा हिजो मौन विरोध कार्यक्रममा गरेको थियो । अध्यक्ष सम्भु श्रेष्ठले रजकका लागि संगठनले अगाडि सारेका मागहरु यथाशीघ्र सुनुवाइ नगरे थप संघर्षका कार्यक्रम अगाडि बढाउने  चेतावनी दिएका छन् ।