रुकुम पश्चिम -११, चैत

ओम मेगाश्री फार्मास्युटिकल्स लिमिटेडले सर्वसाधारणका लागि जारी गरेको आईपीओ मंगलबार (  चैत १२ गते )  बाँडफाँड हुने भएको छ । बिक्रीको जिम्मा पाएको प्रभु क्यापिटल लिमिटेडका अनुसार  लाजिम्पाटस्थित कार्यालयमा मंगलबार बिहान आईपीओ बाँडफाँट हुनेछ ।

कम्पनीले कुल १८ लाख कित्ता शेयर  सर्वसाधारणका लागि जारी गरेको थियो । सो मध्ये, १० प्रतिशत हुन आउने १ लाख ८० हजार कित्ता प्रवासी नेपालीहरूका लागि, ५ प्रतिशत हुन आउने ९० हजार कित्ता  म्युचुअल फण्डका लागि, भने ३ प्रतिशत हुन आउने ५४ हजार कित्ता सेयर कम्पनीका कर्मचारीका लागि छुट्याइएको र बाँकी रहेको १४ लाख ७६ हजार कित्ता सर्वसाधारण लगानीकर्ताका लागि छुट्याइएको  थियो ।

कम्पनीको आईपीओमा १९ लाख ८८ हजार ८ सय ३६ जनाको आवेदन परेको थियो ।  आवेदकमध्य १ लाख ४७ हजार ६ सय जना भाग्यशाली आवेदकले मात्र आईपीओ हात पार्नेछन् । यस तथ्यांकअनुसार, ७.४२ प्रतिशत  आवेदक मात्र सफल हुनेछन् भने बाँकी ९२.५८ प्रतिशत  आवेदकको हात खाली हुनेछ।

क्रेडिट रेटिङ संस्था CARE Ratings Nepal Limited ले ओम मेगाश्री फार्मास्युटिकल्सलाई CARE-NP BB  रेटिङ प्रदान गरेको छ । जसअनुसार कम्पनीले मध्यम जोखिम बहन गर्ने क्षमता राख्नेगर्छ ।

चितवनमा उत्पादन संयन्त्र रहेको ओम मेगाश्री फार्मास्युटिकल्स लिमिटेड २०१६ जुन १२ मा स्थापना भएको थियो । औषधि उत्पादन गर्दै आएको कम्पनी २०२४ फेब्रुअरी १९ देखि आंशिक रूपमा सञ्चालनमा आएको छ।