रुकुम पश्चिम – ३१, भदौ ।
जिल्लाको बाँफिकोट गाउँपालिका वडानम्बर -३ र ५ मा अवस्थित स्यार्पु ताल हिजोआज धेरै पर्यटकको रोजाइमा छ । पर्यटनको प्रमुख गन्तव्य बनेको स्यार्पु बर्खायाममा भरिभराउ हुँदा आँखै अगाडि तालको मनमोहक दृश्य अवलोकन गर्न पाइन्छ । यसकारण स्यार्पुमा वर्षैपिच्छे आन्तरिक पर्यटकको बाक्लो उपस्थिति बढ्ने गरेको छ ।
स्यार्पु पुगिसकेपछि यहाँ सञ्चालनमा आएका परम्परागतदेखि आधुनिक डुङ्गाबाट तालको चारैतर्फ सयर गर्न सकिन्छ । हिउँद याममा तालको पानी घटेर स्यार्पुको सुन्दरता कम हुने भएपनि बर्खामा भने ताल हेर्न लायक देखिन्छ ।
आकाश जस्तै निलो स्यार्पुको आँगनमा पुग्ने जो कोही पर्यटक हिजोआज डुङ्गा सयरमा भुल्न बाध्य बन्छन् । पर्यटकको मन स्यार्पु तिरै लोभिन्छ । तालको छेउछाउमा होटेल तथा रेस्टुरेन्ट सञ्चालनमा छन् । यहाँ पुगेका अधिकांश पर्यटक स्यार्पुका माछा चाखेर मात्रै फर्किने गरेका छन् ।
२ दशमलव ६ वर्ग किलोमिटर भूभागमा फैलिएको स्यार्पु ताल जिल्लाकै एक प्रमुख पर्यटकीय स्थल हो । यो तालको संरक्षण र दिगो व्यवस्थापनमा तीनवटै सरकार लागि परेका छन् । स्यार्पुतालको प्रचारप्रसारलाई विश्वसामु चिनाउन सके बाह्य पर्यटकको आगमनले यस क्षेत्रको पर्यटन प्रवर्धन र आर्थिक विकासमा सकारात्मक परिवर्तन आउन सक्दछ ।
